P5M ibubo ni Gullas sa merkado sa Naga
CEBU, Philippines - Si Kongresista Eduardo Gullas sa unang distrito sa lalawigan sa Sugbo misaad nga mohatag og P5 milyones alang sa katukuran sa bag-ong merkado sa dakbayan sa Naga.
Kini maoy lakip sa unod sa mensahe ni Gullas sa pagsaulog sa siyudad sa ilang ika-4th charter day niadtong Septiyembre 5, 2011.
Ang maong proyekto gikatakdang sugdan sa pagpatukod sa sunod tuig. Si Mayor Valdemar Chiong nagkanayon nga ang P5 milyones nga ihatag sa kongresista daku na kaayo kining tabang.
Hinuon wala ibutyag sa mayor kung pila ang kinatibuk-ang budget nga igahin sa siyudad alang sa nahisgutang proyekto.
Ang bag-o unyang merkado giplanohan unta ni Chiong nga anha tukoron sa parte sa 15 ektaryang luna nga gi-reclaimed sa siyudad nga karon giplanuhang tukoran og sea port hinungdan nga adto na unya tukoron sa barangay Naalad ang bag-ong merkado.
Sa orihinal nga plano, ang building sa bag-ong merkado nagkinahanglan kini og 1.5 ektaryang luna ug may 3,000 ngadto 4,000 square meters nga floor area.
Ug mokabat ngadto sa P70 milyones ang kinahanglan niining budget.
Ang mayor nagkanayon nga ang daang duha ka andanang merkado diha sa barangay Central Poblacion huot na kaayo hinungdan nga nagkinahanglan na silang mopatukod og laing merkado.
Ang karaang merkado himuon na unya kining City of Naga College. - EIM (FREEMAN)
- Latest
- Trending
