CEBU, Philippines - Nunot sa mga nanggawas nga report kabahin sa mga Koreano nga gipangsignit diha sa dakbayan sa Lapulapu gimando ni Mayor Paz Radaza ang hugot nga pagbantay kanila.
Matud pa ni Lapulapu City Councilor Harry “Don” Radaza ang kapolisan pinaagi ni Lapulapu City Police Office Director Sr. Supt. Anthony Obenza gimandoang hugtan ang pag-monitor sa mga langyaw sa dakbayan.
Ang bag-ong natukod nga Tourist Police maoy mag-una sa maong tahas lakip na ang mga sakop sa Barangay Peacekeeping Action Team ug mga sakop sa Unified Task Force sa matag barangay.
Matud pa ni Radaza nakugang sila sa maong taho nga dunay usa ka Koreano nga gisignit ug gibutang sa usa ka safehouse ug gibuhian lang human lukata sa usa ra gihapon ka Koreano.
Ang konsehal miawhag sa publiko sa pagdangop sa mga awtoridad kung adunay mga tawong kadudahan og lihok sa ilang dapit ilabi na kung kini maglambigit sa usa ka langyaw.
Matud pa ni Radaza ang mga turista maoy usa sa nakahatag og dakong tampo sa pagtaas sa ekonomiya sa dakbayan sa Lapulapu maong angayan sila panalipdan. (BANAT NEWS)