Magsuon misampak sa trak 1 patay

CEBU, Philippines -  Patay ang usa ka tawo ug kritikal ang igsuon niini human ang motorsiklong ilang giluwanan gisungag sa gikasugat nga prime mover nga nagguyod og trailer sa dalan M.C. Briones sa barangay Subangdaku, dakbayan sa Mandaue alas 7:20 sa buntag kagahapon.

Ang namatay mao si Adelito Sonet, 41, samtang talandugon ang igsuon niining iyang angkas nga si Pingson Sonet, 42, nagpuyo sa barangay Hipodromo sa dakbayan sa Sugbo.

Ang drayber sa prime mover mao si Rolando Sagayno, 39, taga sitio San Miguel, barangay Linao sa dakbayan sa Talisay nga nagtrabaho sa Trisalex Trucking nga may kargang mga bugas.

Si PO3 Richard Socayno sa traffic division sa Mandaue City Police Office (MCPO) nga nahinabi sa Banat News miingon nga kusog nga nagdagan paingon sa dakbayan sa Sugbo ang motorsiklo nga giluwanan sa mga biktima.

Ang prime mover paingon sa barangay Tipolo sa maong dakbayan dihang paghidangat sa maong lugar kalit silang nagkasungag sa motorsiklo hinungdan sa grabeng nahiagumang kadaot sa kalawasan sa duha.

Matud pa ni Socayno nga wala magsilbe ang gisul-ob sa managsuon nga helmet nga igo lang mitabon sa ulo.

Ang biktima nga si Pingson Sonet daling gidala sa mga Emergency Rescue Unit Foundation (ERUF) sa Vicente Sotto Memorial Medical Center sa dakbayan sa Sugbo, samtang si Adelito Sonet dali nga gidala sa ambulansiya sa Accident Control and Emergency Response Team (ACERT) ngadto sa Mandaue City Hospital apan namatay kini.

Ang drayber sa prime mover nga mitahan sa kapolisan nga nahinabi sa Banat News miingon nga nahingangha kaayo siya dihang kalit lang mi-overtake sa gisundan nga jeepney ang mga biktima. Uwahi na aron sila iyang malikayan hinungdan sa pagsampak sa duha sa iyang trak. (BANAT NEWS)