Polis sa Balamban gihataga'g computer

CEBU, Philippines -  Mihatag og duha ka mga computer set ug handheld radio ang Tsuneishi Heavy Industries sa kapolisan   sa bag-ong gitukod nga police outpost didto sa sitio Kuros-Kuros sa barangay Gaas lungsod sa Balamban.

Niadtong Huwebes pormal nga gi-turn over sa maong kompaniya ngadto kang Sr. Supt. Patrocinio Comendador, hepe sa kapolisan sa probinsya didto sa buhatan niini ang nahisgutang mga butang. 

Ang maong outpost gituyo pagtukod sa kapolisan didto sa maong lugar tungod kay mingaw kaayo alang sa mga tawo nga magsakay og sakyanan nga moagi sa transcentral highway.

Atol sa turn over, ang Tsuneishi Heavy Industries gi-representahan ni retired coronel Clarence Martinez nga maoy security general sa maong kompaniya.

Matud pa ni Martinez nga ang mga ekipo nga gihatag sa kompaniya magamit kaayo sa kapolisan sa lungsod sa Balamban ug sa Provincial Police Office (CPPO) sa ilang operasyon matag adlaw batok sa tanang klase sa krimen.

Sa iyang bahin si Comendador mipadayag sa iyang kalipay tungod kay mapalambo pa og maayo ang ilang serbisyo ngadto sa katawhan pinaagi sa mga kahimanang ilang nadawat.

Ang maong police outpost guwardiyado sa mga polis adlaw ug gabii. (BANAT NEWS)