Imported meat frozen gyud- utlang

CEBU, Philippines -  Gitambagan sa hepe sa Department of Veterinary Medicine and Fisheries nga si Dr. Alice Utlang ang publiko nga segurohong frozen gyud kung buot nilang mopalit og imported meat.

Dugang pa niya nga kinahanglan didto sa meat shops nga nakarehistro sa DVMF ug sa National Meat Inspection Service (NMIS) ang ilang palitan.

Matud pa nga ang imported nga karne kinahanglang sakto ang pagka-refrigerate sanglit dali ra kini mataptan sa kagaw kung dili kini frozen.

“Dapat sa tindahan gyud ta mamalit nga naka-register gyud sa atong buhatan kay alang-alang raman sab kini sa kaayohan sa ilang panglawas,” suma pa ni Utlang.

Pabilin usab nila karon nga gi-monitor ang mga nag-negosyo og imported nga karne nga giingong gisuroy lang sa mga balay ug gani si Utlang mibutyag nga aduna silay bag-ohay lang nadakpan nga namaligya niini sa susamang paagi.

“Dili mana pwede nga isuroy, kay kinahanglan nga ibutang man gyud na pirmi sa freezer ang imported meat,” suma pa ni Utlang.

Samtang ang regional director sa NMIS nga si Dr. Romeo Capa misaysay dinhi sa Banat News nga wala’y hunong ang ilang pag-monitor sa nagkadaiyang tindahan sa karne aron masigurong misunod sila sa saktong pamaagi sa pagbaligya og karne. (BANAT NEWS)