NGCP-substation gisugdan

CEBU, Philippines -  Corella, Bohol--Malaumon ang probinsya sa Bohol sa paspas nga pagsaka sa ilang ekonomiya nunot sa kasigurohang gipasalig kanila sa National Grid Corporation of the Philippines nga mipahigayon sa ilang groundbreaking ceremony alang sa Bohol Backbone Transmission Project kagahapon diha sa barangay Sambog, Corella, Bohol .

Si Bohol Gov. Edgar Chatto kinsa maoy pinasidunggang dinapit sa maong kalihukan miingon nga samtang nagkadugay ang panahon nagtubo ang ekonomiya ug milambo ang negosyo sa ilang probinsya apan nagkadako ang panginahanglan nila sa kuryente.

Giangkon niya nga naglisod kaniadto ang Bohol sa pagsaka sa estado niini ilabi na aron makigkompetensya sa ubang lalawigan sa nasud alang sa nasudnong pundo.

Apan karong milambo na ang Bohol ilabi na sa natad sa turismo nakakawat na kini og atensyon sa pamunoan ni Presidente Benigno Aquino III base sa pamahayag kaniya ni Department of Transportation and Communication (DOTC) secretary Manuel Roxas kagahapon.

Ang mayor sa Corella nga si Mayor Jose Nicanoy Tocmo sa iyang pamahayag nagpasalamat sa NGCP ug sa mga molupyo sa mga barangay sa iyang lungsod nga midawat sa maong proyekto.

Siyam ka mga lungsod ug 60 ka barangay ang mabulahan sa maong proyekto nga mao ang Balilian, Carmen, Catigbian, Corella, Cortes, Dagohoy, Sagbayan, San Miguel ug Ubay.

Kini naglakip usab sa expansion sa Ubay Substation ug magkutay og 95 ka kilometrong transmission line sumpay sa Corella substation (Sambog) nga may ibutang nga 100-megavolt ampere power transformer. Samtang si Dominado Geonzon sa NGCP nagkanayon nga kini katumanan sa dugay nang pangandoy sa Bohol kinse na ka tuig ang nakalabay nga mamahimong abunda ang suplay sa kuryente sa ilang isla.

Lakip sa mitambong ang lokal officials, 34 ka pamilyang nanag-iya sa 5.4 ektaryang luna nga gitukoran sa substation ug pipila sa mga tag-iya sa luna nga giagian sa transmission lines. (BANAT NEWS)