Rob leader posibleng wa na dinhi

CEBU, Philippines -   Nakagawas na dinhi sa Sugbu ang gitumbok nga lider sa Quiapo, Cabando Robbery Group nga si Dionesio Cabatingan alyas Junjun Cabando nga samaran sa iyang sampot human nakigpinusilay sa kapulisan niadtong Lunes sa buntag.

Ang grupo ni Cabatingan mitulis sa teller sa China Bank nga paingon maghatud og kwarta sa foodcourt sa Robinsons Department Store nga miresulta sa pagkamatay sa iyang tulo ka mga kauban apan nakapatay usab sa duha ka escorts sa teller ug duha ka mga pulis nga miresponde ang naangol.

Si Sr. Supt. Melvin Ramon Buenafe, hepe sa Cebu City Police Office (CCPO) nagkanayon nga posibleng nakagawas na sa Sugbu kini tungod kay nakadawat sila og report gikan sa kapulisan didto sa Mindanao nga naabot na didto ang tulo niini ka mga kauban nga naila lang sa ngalan nga John Paul, alyas Kambal Legaspi ug alyas Boljak.

Matud ni Buenafe ang tulo posibleng kauban ni Cabando ug dili direktang nakaapil sa pagtulis niadtong Lunes o ba kaha maoy nagmaneho sa laing sakyanan nga maoy gihimo untang getaway vehicle.Si Cabando giingong nakit-an sa barangay Guiwanon sa lungsod sa Compostela niadtong Lunes nga dunay mikuhang pribadong sakyanan.

Subli niyang giawhag ang kapuyo ni Cabando nga patahanon ang suspek aron mapatambalan ang samad nga naangkon niini ug gipasalig niini ang iyang seguridad.

Ila usab tun-an kun apilon ba nila pagpasaka og kaso ang nurse ug ig-agaw sa kapuyo ni Cabatingan nga giingong mikuyog sa naulahi pagsugat sa mga sakop niini gikan sa Mindanao. (BANAT NEWS)