6 armadong tawo gidakop

CEBU, Philippines -  Gidakop ang unom ka mga armadong tawo usa niini babaye nga giingong nagpailang mga sakop sa International Police Commission (Interpol) nga buot untang mosulod sa Mactan Cebu International Airport Authority (MCIAA) sa miaging hapon niadtong Miyerkules.

Kagahapon sa buntag gitanggong na sa detention cell sa Lapulapu City Police Office (LCPO) sila si Genaro Estoque, taga Bankal Lapulapu, Edwin Adolacion, taga Lapulapu base sa ilang Identification Card (I.D), Julia Etorma, taga Town Homes subdivision sa barangay Talamban, Picondo Asher Asostique, Tirso Peñaflor ug Joeribe Galllarde Comendador.

Sila nagpailang mga enlisted personnel sa Armed Forces of the Philippines (AFP) giingong nag-ranggo og First Lieutenant ug mga Master Sergeants.

Si Insp. Gilbert Tagayom, acting chief sa Philippine Center for Aviation Security (PCAS)-7 nga nagbase sa MCIAA nga nahinabi sa mga tigbalita kagahapon nagkanayon nga ang unom mi-apply og ID Pass aron makasulod gawas sila sa maong tugpahanan nga walay kuti.

Apan napakyas sila pagpakita og mga dokumentong magsuporta sa ilang gipangayo ug wala sad magkadimao ang ilang tinubagan hinungdan nga dali silang nangayo og backup sa Special Weapons and Tactics (SWAT) ang tugpahanan.

Matud ni Tagayom ang unom nagpailang sakop sa International Police Commission nga usa daw ka Non-Government Organization (NGO) ug may sangang buhatan sa gawas sa nasud.

Ang lima sa unom nakuhaan og tagsa ka .45 nga kalibre sa armas nga dunay magazine ug puno sa mga bala ug mipresentar usab sila og Letter Order ug lisensya sa ilang armas nga walay Permit to Carry Firearms Outside Residence (PTCFOR).

Gisusi sa kapolisan ang gipangangkong grupo sa unom lakip na diha sa Firearms Explosives Security Agency Guards Supervisory Section (FESAGSS)-7 ug sa Armed Forces of the Philippines .

Kasong usurpation of authority, illegal possession of firearms and ammunitions ingon man illegal use of uniforms ang ipasaka sa unom nga pulos nagsul-ob sa unipormeng susama sa SWAT.

Sa pakighinabi sa Banat News ni Comendador gihimakak niining peke ang ilang grupo ug gihatagan sila og katungod pagdala og armas pinaagi sa usa ka mission order nga giluwatan sa usa ka Col. Claudio Domingo sa Army Reserve Command sa Philippine Army nga nagbase sa Los Baños, Laguna.

Matud pa ni Comendador nga makahimo sila og operasyon apan kinahanglang may koordinasyon sa lokal nga kapolisan.(EIM) (BANAT NEWS)