Bag-ong pusher nadakpan

CEBU, Philippines -  Nasikop atol sa buybust operation sa kapulisan ang taga siyudad sa Danao nga mamaligyaay og shabu nga nagbase sa barangay Marangog sa siyudad sa Bogo niadtong Martes sa alas 2:30 sa hapon.

Ang nadakpan ug nakuhaan gikan sa iyang posesyon og onse ka paketeng may sulod nga gidudahang shabu mao si Romnick Casas Quibeda, 21, lumad nga taga siyudad sa Danao apan kasamtangang nagpuyo sa siyudad sa Bogo diin niya ibaligya ang maong ginadiling drugas.

Gibutyag ni PO3 Allan Dosdos, imbistigador sa Bogo City Police dihang nahinabi sa Banat News subay sa inisyal nga imbestigasyon nga ang suspek mga pipila ka semana pa kining mipuyo sa maong lugar gikan sa Danao.

Apan bisan og pipila ka semana palang nga miestar ang suspek sa usa sa iyang mga paryente diha sa barangay Marangog gidungog dayun kini nga maoy mamaligyaay og shabu sa maong lugar ug nakompirmar kini sa gihimong surveillance sa kapulisan.

Matud ni Dosdos dihang ilang nakompirmar ang maong report gipahigayon dayon ang buy bust operation gamit ang usa ka poseur buyer ug mipalit og P500 nga balor sa shabu.

Dihang gitunol na sa suspek ang duha ka sachet sa shabu dali nila kining gidakop ug nakuha gikan kaniya ang laing siyam pa ka paketeng may sulod nga gituohan gihapong shabu.

Ang suspek mag-atubang unya og kasong kalapasan sa Section 5 sa RA 9165. (BANAT NEWS)