Nagpaabot sa uyab gitulis

CEBU, Philippines - Nawad-an sa iyang salapi ug motorsiklo ang usa ka 25-anyos nga lalaki nga biktima sa pagpanulis alas-5 pasado ang takna kagahapon sa buntag sa atubangan sa ganghaan sa Hermag Village sa barangay Tabok, dakbayan sa Mandaue.

Ang biktima mao si Marcial Pitogo, taga sitio Binabag sa barangay Tayud sa lungsod sa Consolacion ug ang nagtulis mao ang duha ka wala hiilhing mga lalaki nga batan-on.

Si SPO2 Danilo Barrita sa kapolisan sa Presinto 3 sa Basak Police Station nga nahinabi sa Banat News miingon nga gi-parking lang sa biktima sa atubangan sa ganghaan sa Hermag Village ang motorsiklo sa biktima kay gipaabot niini ang hinigugma.

Samtang nagpaabot kalit mitumaw ang duha ka wala hiilhing lalaking may armas ug gition kaniya dayong mideklarar nga tulis.

Dugang pa nga asoy sa biktima nga gikuha sa mga tulisan ang pitaka sa biktima nga adunay sulod nga salapi nga nagkantidad og P1,500 ug lisensiya usab niini.

Si Barrita miingon nga gipangayo pa sa mga tulisan ang yawe sa motorsiklo sa biktima ug gisakyan sa duha ka tulisan dayong paabulhot og padagan pahilayo sa maong lugar. (BANAT NEWS)