CEBU, Philippines - Nag-rally kagahapon sa buntag ang mga sakop sa Bayan ug Bayan Muna Central Visayas ug miawhag kang Chief Supt. Ager Ontog nga kahatagan og hustisya ang pamilya ni Victor Olivar sa dili pa siya mobiya sa Sugbo karong adlawa.
Si Jaime Paglinawan, chairman sa Bayan Central Visayas kinsa maoy nanguna sa rally atubangan sa gate sa Police Regional Office (PRO)7 Headquaters sa Osmeña Boulevard ning dakbayan sa Sugbo nagkanayon gikinahanglang kahatagan og kasulbaran ang kamatayon ni Olivar ug alang kaniya si Ontog dako kaayo og mahimo niini.
Si Ontog mobalhin na usab og puwesto sa laing lalawigan sa nasud ug mobiya na siya sa Sugbo karong adlawa.
Si Olivar gipatay sa wala hiilhing mga kriminal samtang nagsakay og habal-habal didto sa lungsod sa Danao, lalawigan sa Bohol niadtong tuig 2007.
Ilang gipugos si Ontog nga motabang sa pagsulbad sa kamatayon ni Olivar tungod kay gituohan nila nga asset sa military maoy suspek sa maong pagpatay.
Si Olivar maoy pangulo sa Bayan didto sa Bohol ug siya usab ang vice chairman sa Bayan Central Visayas.
Si Paglinawan nagkanayon nga sa wala pa banhigi si Olivar daghan kaayong hulga nga iyang nadawat tungod kay gidudahan kini sa military nga sakop sa terorista ug sakop sa komunistang rebelde. Sa pikas bahin gipasanginlan na usab ni Paglinawan ang kapolisan nga gihimong goon sa usa ka adunahan didto sa Aloguinsan nga buot moilog sa kapin usa ka gatos nga hektaryang yuta nga miresulta hinuon sa pagkabilanggo sa mga mag-uuma niadtong Agosto 29.
Matud ni Paglinawan nga angay unta nga neutral ang kapolisan niadtong tungora, apan ila naman hinuong gipapriso ang mga mag-uuma. (BANAT NEWS)