Kolektor sa bangko gitulis gipatay

CEBU, Philippines - Gipusil patay ang kolektor sa Fairbank og buot untang tulison ang koleksiyon niini nga linibo ka pesos apan gidemalas ang mga tulisan tungod kay way sulod nga kwarta ang nakuha nilang bag kay gitago-an man ilawom sa motorsiklo ang koleksiyon sa biktima.

Ang insidente nahitabo sa highway sa barangay Magdugo siyudad sa Toledo niadtong Martes sa hapon nga miresulta sa kamatayon ni Alvin Limoco, 32, molupyo sa barangay Nangka lungsod sa Balamban ug kolektor sa Fairbank. Duha ka nag-motor nga batan-ong mga suspek nga nag-angkasay ang gitumbok sa mga nakasaksi nga responsable sa krimen.

Matud ni SPO3 Carmelito Hornales, desk officer sa Toledo City Police dihang nahinabi sa Banat News ang biktima gikan sa siyudad sa Naga aron maningil.

Samtang paingon na kining mobalik sa bangko aron i-turnover ang iyang koleksiyon nga gibanabanang moabot og P40 mil wala niya kini isulod sa iyang backpack ug didto niya kini gibutang sa U-Box sa motor.

Pag-abot sa highway sa barangay Magdugo gibabagan sa nag-atang nga duha ka tulisan ang biktima nga nag-angkasay sad sa motorsiklo ug gidiretso pagpusil duha ka higayon ang biktima.

Naigo sa lawas ug ulo ni Limoco hinungdan nga misaliring ang motorsiklo niini paingon sa gutter ug pagkatumba daling mikanaog ang angkas ug gipunit ang backpack sa biktima dayong balik sa motor ug miikyas.

Ang mirespondeng mga polis nakarekober og duha ka kabhang sa kalibre .45 ug cash nga koleksiyon sa biktima sa U-Box sa iyang motorsiklo nga gimaneho.

Gisusi usab sa kapolisan ang anggulong posibleng personal ang motibo sa krimen. (EIM) (BANAT NEWS)