Luigi pabor sa flyover

CEBU, Philippines -  Taliwala sa panagbangi sa mga opisyales sa siyudad sa Sugbo labot sa pagpatukod og laing duha ka flyover project sa amihanang bahin sa siyudad sa Sugbo, si 6th district Congressman Gabriel Luis Quisumbing miingon nga pabor siya sa flyover project nga ipatuman sa siyudad sa Mandue.

Matud pa ni Quisumbing nga ang pagtukod og flyover sa siyudad sa Mandaue labing maayong kasulbaran sa problema sa trapiko sa maong siyudad.

Gawas niini, mas madali pagdagan sa mga negosyo sa maong siyudad ilabina ang pagbiyahe sa mga negosyante paingon sa Mactan Airport.

Gani iyang gitataw nga iyang gisuportahan ang flyover project sa nasudnong kagamhanan sa may dalan Plaridel sa siyudad sa Mandaue ug ang tri-level nga flyover sa UN Avenue sa maong dakbayan.

Kini tungod kay maghatag man kini og dakong hawanan alang sa kasayon sa biyahe paingon sa airport sa Mactan ug ingon man paingon sa amihanang bahin sa lalawigan sa Sugbo.

Iyang gipahibawo nga hayan karong tuiga o kaha sa sunod tuig masugdan na ang phase 1 sa maong proyekto sanglit naandam na ang gahin alang niini nga mokabat sa P188 milyones.

Ang maong proyekto mobalor sa katibuk-an og P350 milyones nga ipatuman sa Department of Public Works and Highways (DPWH).(WC)(BANAT NEWS)