Prinsipal ikiha ni Gwen

CEBU, Philippines -  Gitakdang mosang-at og reklamo si Governor Gwendolyn Garcia batok sa prinsipal sa Guibwangan High School sa lungsod sa Barili ngadto sa Department of Education (DepEd) tungod sa illegal nga pagpaputol niini sa mga dagkong kahoy nga Nangka sulod sa campus sa maong tulunghaan.

Kini human masuta sa gobernador ang lakang ni Mrs. Jeanette Ramirez Guzman, prinsipal sa naasoy’ng tulunghaan pagputol sa 22 ka punoan nga Nangka sa nahisgutang tulunghaan nga nagpangidaron na og lima ka tuig nga tipik ug kabahin sa iyang E Gwen Program.

Nahingpit ang desisyon sa gobernador sa pagduso og reklamo batok kang Guzman human sa usa ka tigom sa iyang buhatan diin iyang gipatawag ang nahisgutang prinsipal sa Guibwangan.

Uban ni Guzman mao sila si Dep-Ed provincial superintendent Dr. Arden Monisit, Director Dechoso sa Department of Environment and Natural Resources (DENR)7 ug ang nagpakitabang ni Gobernador Garcia nga si Guibwangan Barangay Captain Nelson Gingoyon aron madungog usab ang habig ni Mrs. Guzman.

Sa maong tigom nasuta sa gobernadora nga dakong sayop ni Guzman tungod kay nagbuot-buot lamang kini og putol sa 22 ka punoan nga Nangka nga gialima sa mga opisyales sa maong lugar aron moanindot ang ilang barangay nga nahimo nang kabahin sa EGwen project sa lalawigan sa Sugbo. Si Kapitan Gingoyon miingon nga gianugnan siya sa maong mga kahoy nga gitanom niya ug giatiman sulod na sa lima ka tuig ug yano ra kaayong giputol sa nahisgutang prinsipal.

Subay sa reklamo sa gobernadora, si Dr. Monisit miingon nga iyang ihandos ang maong kaso batok ni Guzman ngadto sa legal department aron mahimoan dayon kini og lakang ug mahimong mapahamtangan og administratibang silot kun mapamatud-an ang kasaypanan sa nahisgotang prinsipal.

Gitug-an usab ni Monisit nga mopagawas dayon siya og kamanduan ngadto sa tanang mga school head sa elementarya ug high school sa kalungsoran nga dili gyud magpasagad og putol sa kahoy sa sulod sa ilang school campus aron nga sila dili mag-atubang og imbestigasyon. (BANAT NEWS)