Background ni Horandoy gisusi

CEBU, Philippines - Ang Provincial Intelligence Branch (PIB) makigtinabangay sa Cebu City Intelligence Branch (CCIB) sa pagsusi kabahin sa background ni Lyndon Horandoy, ang suspetsadong gunman ni city assistant prosecutor Patrick Osorio kung wala ba kini kalambigitan sa ubang mga insidente sa pagpamusil sa dakbayan ug probinsiya sa Sugbo.

Si Superintendent Rodolfo Albotra Jr., nagkanayon nga ila kining himoon tungod kay posibleng mao kini mahimong yawi sa mga wala masulbad nga kaso sa pagpamusil.

“We have a good relationship with the CCIB as well as with other intelligence unit and we are sharing some information in solving cases”, ni Albotra pa.

Kahinumdoman nga si Horandoy mipasangil kang Allan Senogat nga maoy misugo kaniyang ipapusil ang drayber sa sakyanan nga miagi diha sa eskina sa Maria Gochan Street ug N. Bacalso Avenue, barangay Mambaling, dakbayan sa Sugbo niadtong Enero 6, 2009.

Matud niya nga wala siya makaila sa maong drayber ug pagsunod adlaw na niya mahibaw-i nga si Osorio diay kadto. Apan pagkasunod adlaw gibakwi ni Horandoy ang maong pangangkon niya sa krimen ug gitakli niya kang Senogat nga mao kunoy mipusil kang Osorio.

Matud usab sa suspetsado nga igo lang siyang nagmaneho sa iyang motorsiklo nga iyang gipamasadahan isip habal-habal.

Sa laing bahin, si Albotra nagkanayon nga sa iyang kasinatian sa pagpahigayon sa iyang trabaho isip otoridad kasagaran sa mga gun-for-hire mogamit og ginadiling drugas ug nagkinahanglan gyud sila og kwarta.

Matud usab niya nga ang mga gun-for-hire posibleng wala makaila sa ilang mga subject tungod kay hatagan lang sila og ngalan niini sa mosuhol kanila.

Gibutyag sa hepe sa PIB nga ang bayad sa mga small time nga gun-for-hire maggikan sa P10,000 ngadto sa P20,000 matag usa ka tawo nga patyon ug kadtong mga bigtime gikan sa P40,000 ngadto sa P50,000 ang bayad ug depende usab kini kung inila ang patyonon.   - (BANAT NEWS)