Gwen wa magtagad sa kagubot sa Aloguinsan

CEBU, Philippines - Giklaro ni Governor Gwendolyn Garcia nga dili siya manghilabot sa kagubot sa pagkoral sa usa ka asyenda sa lungsod sa Aloguinsan nga miresulta sa pagkasikop sa pipila ka mga mag-uuma sa nahisgutang lungsod nga mipahigayon og barikada.

Matud pa ni Garcia nga andam kaayo siyang motabang sa mga mag-uuma ilabina niadtong gikan sa kalungsoran sa lalawigan sa Sugbo.

Apan gipatin-aw sa gobernador nga ang iyang tabang dili mahimong ikahatag niadtong mga mag-uuma gikan sa Aloguinsan nga gidakop sa kapolisan tungod sa pagbarikada aron pagsanta sa pagkoral sa usa ka asyenda sa maong lungsod.

Kini tungod kay ang kaso sa nahisgutang mga mag-uuma atua na man sa korte, dugang pa sa gobernador.

Iyang gipasabot nga dili siya usa ka politiko nga hangol og publicity aron lamang ma-headlines sa mga pamantalaan sama sa gihimo ni kanhi senador Sonny Osmeña hinungdan nga dili siya magpa-papel sa gidangatan karon sa mga mag-uuma. 

Sa nasayran si Osmeña dali kaayong miposing sa prisohan diin mikagulkol ang 36 ka mga mag-uumang gisikop sa kapolisan sa milabay’ng semana.

Kini sa dihang ang mga hingtungdan misukol sa mga otoridad pinaagi sa pagpamato diin ubay-ubay nga mga polis ug security guard sa pribadong luna nga gikoral ang nangaangol sa maong hitabo.

Ang tumong ni Osmeña mao nga ikaplastar ang iyang dagway sa mga pamantalaan aron sa makausa pa hikit-an ug mabasahan sa katawhan nga kunohay midapig siya sa mga dinaugdaog, matud pa ni Garcia.

Midugang ang gobernador nga mao kanay  estilo sa mga trapo kon traditional politician.   (WC)   - (BANAT NEWS)