Panglawas sa taga Naga panalipdan

CEBU, Philippines - Si Mayor Valdemar Chiong sa dakbayan sa Naga sa iyang State of Naga Address (SONA) kagahapon mipasalig nga dili masakripisyo ang panglawas sa mga Naganhon bugti sa kalamboan sa siyudad.

Mikabat sa 28 minutos ang SONA ni Chiong diin iyang gilakbit-saysay ang mga natukod nga industriya sa siyudad ug matud niya sa mga motukod pa og mga patigayon diha sa dakbayan,  andam siyang mosuporta niini apan iyang klarohon nga dili niya isakripisyo ang panglawas sa mga Naganhon.

Ang mga motukod og patigayon sa siyudad kinahanglang mosunod ug mosubay sa mga pamaagi nga gipatuman kanila sa kagamhanan sa siyudad.

Ang Naga maoy usa sa gitarokan og nagkalainlaing industriya sa habagatan ug ang mayor mapasalamaton niini tungod kay daku kaayo kining pabor sa mga Naganhon ug iyang gipasalig nga panalipdan nila pag-ayo ang kalikopan.

Lakip sa SONA gisaysay ni Chiong nga sa mga local government unit (LGU) sa Rehiyon 7, ang Naga lang maoy gitugotan sa pagpasira sa ilang landfill tungod kay nagtukod sila og alternatibong solusyon nga mao ang Integrated Solid Waste Management (ISWM) nga nahimutang sa barangay Pangdan.

Ang ISWM gidumala kini sa FDRCon diin target niini ang zero waste ug ang mga basura nga malabay sa maong pasilidad ma-recycle diin ang uban mahimong abuno ug ang uban mahimong alternatibong gas nga ilang gisuplay ngadto sa APO Cement.

Ang kagamhanan sa Naga mihatag usab og pagtagad sa panglawas sa mga molupyo sa siyudad pinaagi sa pagdugang sa budget alang niini matag tuig.    - (BANAT NEWS)