Giplanong duha ka fly-over maka-pasamot sa trapiko

CEBU, Philippines - Dakong kadaot ug mosamot ang problema sa trapiko sa dakbayan sa Sugbo kun ipadayon pagtarok sa duha ka mga flyover nga maoy rumbo karong ipatuman   sa Department of Public Works and Highways (DPWH)   sa MJ Cuenco ug sa Gorordo ning dakbayan.

Kini maoy gihulagway ni Architect Maria Lourdes Joy Onozawa kinsa usa sa mga sakop sa grupo sa propesyonal sa Sugbo nga nanawagan nga dili angayan ipadayon ang maong mga proyekto.

Nagkanayon si Onozawa nga dili haom ang flyover sa nahisgutang dapit sanglit makahout na kini sa lugar ug ang labing maapektohan niini ang mga tawo nga molabang sa maong mga dapit.

Nagkanayon si Onozawa nga menos man ang problema sa trapiko sa Gorordo busa dili na kini angayang butangan pa og flyover.

Sumala pa niya nga 90% sa mga tawo ang walay kaugalingong sakyanan ug sila maoy dali nga maapektohan sa mahatag nga problema sa flyover.

“Angayan gyud na huna-hunaon, kay dili man gyud bagay ang lugar nga butangan og flyover. Makasamot na hinuon na sa problem sa traffic,” matud pa ni Onozawa.

Dugang pa niya nga importante kaayo ang master plan sa usa ka proyekto sama sa flyover kung diin mag-agi gyud kini og igong konsultasyon sa katawhan.

Samtang si Mayor Michael Rama nagpadayon sa iyang pakigbisog nga dili gyud idayon ang maong proyekto gumikan kay maguba ang historical site sa mga lugar nga matabunan kung matukod na ang flyover.

Nabalaka usab ang mayor gumikan kay dako kini og ikahatag nga problema ngadto sa mga negosyo nga nahimutang sa maong dapit.  - BANAT NEWS