CEBU, Philippines - Gilaraw ni Mayor Michael Rama nga makaangkon og kaugalingong barge ang siyudad sa Sugbo aron maoy mosuroy sa mga coastal areas pagkolekta sa basura sa mga baybayon.
Nagkanayon ang mayor nga gawas sa patag, angayan usab kahatagan og pagtagad ang dali nga paghipos sa basura sa kadagatan ubos sa hurisdikyon sa siyudad sa Sugbo.
Kung makaangkon na og barge ang siyudad, dali ra malimpiyo ang costal areas nga makahatag usab og nindot nga atraksyon ang palibot.
Dili pa hinuon matino sa mayor kung kanus-a matuman ang mao niyang plano sanglit aduna pa’y daghan niyang gilaraw nga una pa niini.
“Duna gyud ko’y kaugalingong lista sa mga problema ug mga kinahanglanon sa siyudad, mao na nga anam-anamon na nato og sulbad,” matud pa ni Rama.
Giklaro ni Rama nga seryuso karon ang iyang kampanya sa hustong paghipos sa basura ug matag hapon sa ilang panagtigom sa city hall mao kini ang ilang gihisgotan sa kanunay.
Nagpasalamat ang mayor sa mga Sugbuanon gumikan kay mayoridad niini ang nituman na gyud sa tukmang pagbahig sa basura tali sa malata ug dili malata. - BANAT NEWS