Dinasmagay sa duha ka de karga nakaangol og 5 ka tawo

CEBU, Philippines - Lima ang angol sa dinasmagay sa duha ka trak de karga didto sa crossing sa Poblacion, lungsod sa Tabuelan niadtong Biyernes sa alas 2:00 sa kaadlawon.

Ang mga biktima mao sila si Juanito Salubre Cabanez Jr., ang drayber sa Isuzu cargo truck Forwarder   ug ang   iyang mga sakay nga sila si Ryan Branzuela,31 anyos, ulitawo, Robert Cbanez, 30 anyos, minyo, Archie Sanchez 21 anyos, ulitawo ug Hilbert Cabanez, 25 anyos, ulitawo ug pulos taga barangay Talisay lungsod sa Daanbantayan.

Samtang ang kadasmag sa gisakyan sa mga biktima mao ang Puso truck nga gipanag-iya sa usa ka Richard Sabadoki   nga taga St. Patria Village Villamonte, Bacolod City nga gimaneho ni Dennis Panis, 21, ulitawo, nga taga Victoria City, Negros Occidental. Si SPO1 Ballovar Adolfo sa Tabuelan Police Station mibutyag sa Banat News nga ang Puso truck nagpaingon sa pantalan sa Tabuelan gikan sa dakbayan sa Sugbo, samtang ang Isuzu forwarder gikan usab sa Toledo ug paingon sa lungsod sa Daanbantayan.

Gihulagway nga di pa suhito sa maong lugar ang drayber sa Izusu Forwarder   kay pag-abot niini sa crossing wala kini momenor, sama usab sa drayber sa Puso nga nagbaguros usab paglabang niini sa crossing busa husto ra kaayo kanila ang higayon nga nakatilaw sila og tukmang leksyon sa ilang pagka-drayber.

Gilupig ang Forwarder kay naangol man lakip ang drayber niini samtang ang Puso walay bun-og ang mga sakay sa maong sakyanan.  - BANAT NEWS