Vendor sa Mandaue gimahalan sa stall

CEBU, Philippines - Mga manindahay sa karaang merkado publiko sa dakbayan sa Mandaue dili supak nga balhinon sila ngadto sa bag-ong merkado publiko sa Sitio Tribunal, barangay Centro apan ang ilang gikabalak-an mao ang P30,000 nga lease right nga ilang balayranan.

Ang pipila ka manindahay sa nahisgotang merkado miingon nga bug-at alang kanila ang pagbayad og P30,000 nga puwesto sa bag-ong merkado apan hayan nga mahimo lamang nilang agwantahon sa pagbayad kun kini ipaagi lamang sa data-data nga paagi.

Gipasabot sa mga manindahay nga sa balhinan nilang bag-ong merkado dili dayon nila masiguro nga kusog ang halin sa ilang pagpaninda sanglit dili man nila masiguro nga mokuyog usab dayon ang ilang mga suki sa pagpamalit sa maong dapit.

Si Market Administrator Mossolini Soliva miingon sa interview sa   DYKC Radyo Ronda nga ang lease right maoy bayranan sa mga nagtinguha nga makabaton og kaugalingong puwesto sa bag-ong merkado.

Gitataw niya nga bag-o na kini nga pamaagi sa bag-ong merkado publiko sanglit dili sama sa karaang merkado nga matag adlaw lang nga abang ang bayran sa mga manindahay sa matag puwesto nga ilang giukopar.

Sa nasayran nga subay sa giplano sa kagamhanan sa maong dakbayan nga ang karaang merkado ilang hingpit nga ibakante karong umaabot nga   Nobyimbre niining tuiga.

Si Mayor Jonas Cortes miingon nga dili na luwas ang karaang merkado alang sa mga mamaligya ug sa mga tawo nga mamalit sa maong dapit tungod sa kahuyang na sa estraktura sa maong edipisyo human kini masunog niadtong Enero 30, 2000.

Kahinumdoman nga human masunog ang maong karaang merkado gisugdan gilayon sa pagpatukod ni kanhi Mayor Thadeo Ouano nga board member na karon sa ikaunom nga distrito sa lalawigan sa Sugbo ang bag-ong merkado sa sitio Tribunal sa barangay Centro.

Natapos ang termino ni Ouano niadtong tuig 2008 ug gipadayon kini ni Mayor Cortes sa iyang pag-asumer sa katungdanan isip mayor sa dakbayan.  - BANAT NEWS