KBP month pormal nga gibuksan

CEBU, Philippines - Pormal nga gibuksan kagahapon sa buntag ang pagsaulog sa Broadcasters Month pinaagi sa usa ka parade nga nagsugod sa Fuente Osmeña ug didto matapos sa gymnasium sa Cebu Technological University (CTU) Cebu City Campus.

Gatosan ka mga   magsisibya sa telebisyon ug radyo dinhi sa Sugbo ang naghugop sa pagsalmot sa maong kalihukan kinsa tanan sakop sa Kapisanan ng mga Brodkaster ng Pilipinas (KBP)-Cebu Chapter.

Usa ka santos nga misa ang gipahigayon sa gymnasium sa CTU nga gipangulohan ni Fr. Joshue Cadorna kinsa misaysay nga importante kaayo ang papel sa mga magsisibya sa radyo ug telebisyon ngadto sa komunidad sanglit mao kini ang nahimong instrumento aron dali nga masayran sa katawhan ang mga panghitabo sa ilang palibot.

Matud pa ni Cardona nga ang kanunay nga pag-ampo mao pu’y pamaagi nga magiyahan ang mga magsisibya sa ilang panarbaho.

“Panghinaut lang nako nga dili unta maluya ang media sa paghatud, pagbarug ug pagsulti sa kamatuoran. Ang pagsulti sa kamatouran maghatud kanato sa hingpit nga kagawasan,” suma pa ni Cardona.

Samtang ang presidente a KBP-Cebu Chapter nga si manlalaban Ruphil Bañoc misaysay nga naghiunsa ang mga sakop sa media sa Sugbo sa pagyagyag sa mga panghitabo sa palibot ug mitambag usab siya sa iyang mga kaubanan nga palapdan pa og maayo ang ilang pagpanibya aron dili maapsan sa taas na kaayo nga matang karon sa   teknolohiya.

Giklaro hinuon ni Bañoc nga nagpabilin gihapon karon nga kusog sa masa ang industriya sa radyo bisan pa man nga nagbaha ang ubang tinubdan sa   impormasyon sama sa internet ug uban pa.

Dugang pa niya nga kusog gihapon ang radyo sanglit mao naman kini ang naandan sa katawhan.

Gipahigayon usab kagahapon ang Miss KBP 2011 kung diin ang pambato sa ABS-CBN nga si Phoebe Kaye Fernandez maoy nakaangkon sa nahisgutang titulo.  - BANAT NEWS