Bugaw wa tugting makapiyansa

CEBU, Philippines - Usa ka bugaw kinsa napriso gumikan sa paglapas sa anti-Trafficking in Person Act wala tugoti sa korte nga makapiyansa.

Si Prosecutor Simaco Labata miingon nga dili angayang hatagan og temporaryong kagawasan ang maong bugaw  tungod sa kalig-on sa mga ebidensya batok kaniya.

Ang suspetsado giingong nang-recruit og mga babaye nga iyang ibaligya ngadto sa mga kostumer nga mga lalaki.

Sa joint affidavit sa mga polis nga misikop sa suspetsado nagkanayon nga niadtong Agosto 23, 2011 si Senior Inspector Maria Theresa Macatangay nakadawat og report bahin sa ilegal nga kalihukan sa suspetsado kansang ngalan gipugngan sa korte, kinsa giingong nagbuhi og mga babaye nga iyang ibaligya ngadto sa iyang mga kustomer.

Human makompirma sa kapolisan, mipahigayon dayon sila og entrapment batok sa maong bugaw.

Sila si PO2 Lyman Arsua ug PO3 Napoleon Talingting Jr. maoy nagsilbing   poseur costumer ug nakigsabot dayon sa suspetsado nga kunohay gusto silang mobayad og mga babaye.

Niadtong Agosto 25, 2011 sa alas 7:00 sa gabii ang confidential agent sa kapolisan mi-contact dayon sa suspetsado ug nagsabot sila sa lugar diin sila magkita.

Ug human sila magkasabot miabot dayon ang tulo ka babaye   ug si Talingting maoy mitunol sa P3,000 nga kwarta nga kunohay pasiunang bayad ngadto sa suspetsado, apan igo lang kining nakahikap makadiyot sa kuwarta giposasan dayon siya sa kapolisan.

Ang tulo ka mga babaye gitugyan sa mga polis ngadto sa Department of Social Welfare and Development (DSWD) samtang ang suspek nagpahayahay na karon sa prisohan.   - BANAT NEWS