Mamumuo diskontento sa P20

CEBU, Philippines - Bisan kun nahukman na sa Regional Tripartite Wages and Productivity Board (RTWPB) 7 ang usbaw nga P20 sa suholan sa pribadong sektor, nagpabiling pulos diskontento ang grupo sa pamuo ug ang mga amo kon management group.

Tungod kay alang sa taga labor group, kuwang kaayo ang maong umento, samtang alang sa mga amo dako ra kaayo ang maong usbaw ug bug-at kaayo alang kanila ang pagtuman niini.

Apan bisan pa niini gitagalan sa RTWPB og 15 diyas human sa opsiyal nga publikasyon ang pagpatuman sa maong umento sa suholan sa mga mamumuo sa pribadong sektor   sa Central Visayas.

Gikan sa kasamtangang P285 matag adlaw, mahimo nang P305 ang inadlaw nga suholan sa mga trabahante dinhi sa rehiyon.

Sumala ni Assistant Regional Director Efren Carreon sa National Economic Development Authority (Neda) 7 kinsa sakop sa hunta sa RTWPB nga taas gyud nga proseso sa ilang pagtuki sa petition sa mga mamumuo alang sa umento sa suholan   tungod kay gibalanse nila ang kahimtang sa ekonomiya sa nasud karon.

Apan ang mga sakop sa hunta nga naggikan sa labor sector wala makontento sa maong usbaw kay gigamyan ra niini ilabi na nga nagmahal na karon ang presyo sa mga nag-unang palaliton.

Samtang himoong uniporme ang pag-pausbaw sa suweldo sa tibuok rehiyon , ang management group misaysay nga dako ra gyud kaayo ang P20 ug nabug-atan sila niini.

Ang representante sa negosyante nga si Charles Streegan nagkanayon daghan unya nga mga negosyante ang masagmuyo niini sanglit dako ra gyud kaayo ang maong kantidad.

Ang business sector nabalaka gumikan kay posibleng daghan na unya nga mga negosyo ang manira gumikan sa bag-ong usbaw sa suholan.

Samtang si Remirina Morquello, usa ka mamumuo, mibutyag sa  Banat News nga bisan gamay ra ang P20, nalipay lang gihapon siya niini gumikan kay makatabang na kini sa inadlaw-adlaw nga panginahanglan sa matag pamilya sa mamumuo.   - (BANAT NEWS)