Motahang NPA tabangan gihapon

CEBU, Philippines - Andam gihapon motabang ang Kapitolyo sa mga kanhi sakop sa rebeldeng New People’s Army nga buot mobalik sa sabakan sa gobiyerno bisan kung ang lalawigan sa Sugbo gideklarar na nga insurgency-free.

Kini ang giklaro ni Gob. Gwendolyn Garcia human nasayod sa pagpanagana pagduol sa mga opisyal sa lungsod sa Tuburan aron matabangan sa Kapitolyo ang ilang residente nga si Dennis dela Cerna Basera, alyas Kumander Orig ug James nga bag-ohay lang mitahan gikan sa kalihukan sa mga rebelde.

Nalipay si Garcia nga naabot sa iyang buhatan ang maong taho aron iya kining mahisgutan ngadto sa 78th Infantry Battalion.

Matud pa ni Tuburan Mayor Democrito Diamante nga usa sa iyang mga konsehales mipahibawo kaniya nga wala na’y ayudang mahatag ang Kapitolyo sa mga kanhi sakop sa rebelde hinungdan nga naaghat ang mayor pagtunol og P10,000 nga hinabang sa pagsugod sa bag-ong kinabuhi ni Basera.

Si Garcia nagkanayon nga siya gyud unta ang angayang giduol ug dili ni bisan kinsa lang sa Kapitolyo aron mahisgutan ang maong kaso.

Giklaro ni Garcia wala pay lagda sa balaud nga nagdili kanila sa pagtabang niadtong mga kanhi sakop sa rebeldeng NPA nga gusto na nga magbag-o sa ilang kinabuhi.

Siya midugang nga duna na’y susamang kaso nga didto gikan sa Negros Oriental ang rebeldeng nitahan apan gitabangan gihapon sa lalawigan sa Sugbo sanglit anaa na sa lungsod sa Catmon ug dakbayan sa Danao nanimuyo.   - (BANAT NEWS)