Gikan nag-jogging nalumos

CEBU, Philippines -  Nalumos ang usa ka 23-anyos nga lalaking gikan pang nag-jogging sayo sa buntag sa barangay Marigondon, dakbayan sa Lapulapu sayo sa buntag niadtong miaging adlaw.

Si SPO1 Allan Pantaleon sa Homicide Section sa kapolisan sa maong dakbayan miila sa namatay mao si Mark Rey Carabuena, taga barangay Basak sa maong dakbayan .

Matud pa ni Pantaleon nga nahinabi sa Banat News nga kuyog ni Carabuena ang iyang higala nga nag-jogging gikan sa ilang pinuy-anan subay sa baybayon padulong sa barangay Marigondon.

Sa ilang paghidangat sa nahisgutang lugar ilang nalabyan ang nahisgotang beach resort ug dihang ilang nakita ang ilang higala nga care taker ilang gisulayan sa paghangyo nga mangaligo.

Dugang pa ni Pantaleon nga si Carabueana milangoy paingon sa lawom nga bahin apan pipila ka gutlo ang nakalabay kalit lang kining misinggit sa pagpangayo’g panabang.

Dali kining giduol sa ubang mga tawo ug gidala ngadto sa daplin sa baybayon ug ilang gitabang samtang kini wala nay panimuot ug paghatud sa Emergency Rescue Unit  Foundation (ERUF) sa Mactan Doctors Hospital gideklarar kini nga patay na.   - (BANAT NEWS)