400 habal-habal drivers maghugpong

CEBU, Philippines - Kapin sa 400 ka mga drayber sa habal-habal sa barangay Apas, barangay Lahug ug barangay Busay ang nagkauyon sa pagtukod og kapunongan aron masumpo na ang mga drayber nga magpataka lang og pick-up og mga pasahero.

Si Mayor Michael Rama ang namulong kagahapon sa gihimong tigom sa mga drayber sa habal-habal kagahapon sa Apas Sports Complex ug misaysay nga angayang i-organisar ang mga drayber sa habal-habal aron tulin ang ilang operasyon nga dili makasamok sa kadalanan.

Nahugyaw ang katawhan sa dihang nagsakay og motor ang mayor sa pagsulod niya sa complex isip pagpakita nga suportado niini ang pag-organisar sa mga drayber sa habal-habal.

Sumala pa sa kapitan sa Apas nga si Ramil Ayuman nga ilang suportahan ang Oplan Hagibis nga gidumala sa siyudad sa Sugbo aron masumpo ang mga badlungong habal-habal drivers.

Ang Apas maoy nagsilbing pilot area sa pag-organisar sa drayber sa mga habal-habal ug pinaagi niini kinahanglang aduna silay uniporme ug ID aron sa ingon makontrolar ang gidaghanon sa mga motorsiklong makapamasahero sa maong mga barangay.

Panghinaut ni Ayuman nga mao usab kini ang buhaton sa ubang barangay aron makatabang sa pagsulbad sa problema sa trapiko. Gitun-an na usab kung asa sila mamahimong mag-terminal.   - (BANAT NEWS)