CEBU, Philippines - Ang giingong trigger man ni assistant City Prosecutor Patrick Osorio mibakwi sa iyang pangangkon nga siya maoy mipusil patay sa biktima.
Si Lyndon Horandoy sa report sa ABS-CBN kagahapon sa buntag mitumbok nga si Allan Senogat maoy miluthang kang Osorio.
Iyang giasoy nga siya maoy nagmaneho sa motorsiklo nga ilang gisakyan ug didto sila manago sa barangay Tabunok, dakbayan sa Talisay human sa maong pagpamusil.
Kini sukwahi sa una niyang pamahayag diin iyang giangkon nga siya maoy mipusil kang Osorio ug gani gisuwat pa ang maong pamahayag nga may pirma mismo niya.
Sa maong pamahayag miangkon si Horandoy nga gisugo siya ni Senogat nga pusilon ang drayber sa kolor puti o silver nga Revo.
Gibutyag usab niya nga silang duha nagsakay sa usa ka motorsiklo nga gihimo niyang habal-habal.
Matud ni Horandoy nga wala siya makaila sa tawong gipapusil kaniya ug nianang pagkabuntag na niya mahibaw-i nga si Piskal Osorio diay ang iyang napatay.
Apan sa iyang pagpanghimakak kagahapon iyang gisulti nga napugos lamang siya pag-angkon human siya hidakpi tungod sa iyang kahadlok sa mga otoridad.
Kagahapon sa hapon ang abogado ni Horandoy mitungha sa Cebu City Police Office (CCPO) ug nakig-estorya kaniya. Apan si Chief Inspector Romeo Santander, hepe sa City Intelligence Branch (CIB) sa pakighinabi sa Banat News kagahapon nagkanayon lig-on nga misulti nga wala mobakwi sa iyang nahaunang pamahayag si Horandoy.
Matud niya nga walay nausab sa mga pamahayag niini apan wala pa nila ikaduso ang kaso batok sa suspetsado kagahapon tungod kay nagkinahanglan pang mopirma og extra judicial confession si Horandoy nga inabagan sa iyang abogado.
Si Horandoy giingong mibutyag ngadto sa mga polis nga gibati siya og kahadlok nga magkaabot sila ni Senogat sa prishohan.
Matud usab ni Santander nga dili usab nila dali-dalion og pasaka ang kaso aron masiguro nga wala kini mga buslot.
Midugang kini nga posibleng sa Lunes sa buntag na nila mapasaka ang kaso ngadto sa korte. (BANATNEWS)