Kawatan sakpan sa CCTV

CEBU, Philippines - Usa ka kawatan ang nakuha sa CCTV camera sa establisamento sa barangay Poblacion, dakbayan sa Lapulapu alas-7 pasado ang takna sa miaging gabii atol sa pagpangawat niini.

Si PO1 Ruben Dayon sa kapolisan sa Presinto 3 sa Poblacion, dakbayan sa Mandaue miingon nga ang gikawatan nga establisamento mao ang Need Ink Company nga nahimutang sa dalan 288 S. Osmeña sa barangay Poblacion sa maong dakbayan.

Matud pa niya nga midangop sa pagtaho sa ilang buhatan ang piniyalan sa maong establisamento nga si Jesson Gimena, 39, human madiskubrehing gikawatan na ang ilang tindahan.

Sa taho ni Gimena nawagtang na ang laptop nga nagkantidad og P70,000 nga gibutang sa sulod sa ilang buhatan.

Si Dayon miingon nga gumikan niini nakahukom ang tagdumala sa maong establisamento pagtan-aw sa record sa CCTV camera pagsuta kun si kinsa ang mikawat niini.

Diha nila makita sa CCTC camera ang usa ka wala mailhing lalaki nga misulod agi sa pultahan ug sa paggawas yano kaayong nagbitbit sa maong butang. Ang kapolisan padayon pang nangita sa maong kawatan. (BANATNEWS)