Dancer giluba sa kaubang dancer

CEBU, Philippines - Misangpot sa pagpanunggab ang panaglalis sa duha ka dancers sulod sa ilang dressing room sa Arena KTV nga anaa mahimutang sa 3rd Avenue , barangay Carreta siyudad sa Sugbo niadtong Huwebes sa gabii.

Giila sa kapolisan ang biktima mao ang 30-anyos nga dalaga, residente sa barangay Sambag I siyudad sa Sugbo samtang ang gitumbok nga midunggab kaniya mao ang 20-anyos nga kaubang dancer ug residente sa barangay Alaska Mambaling, siyudad sa Sugbo.

Sumala pa ni PO2 Cristobal Geronimo sa imbestigasyon sa Homicide Section sa Cebu City Police Office ang biktima giingong mikomprontase sa suspek aron klaruhon ang tabitabi nga uyab sa suspek ang kapuyo sa biktima.

Apan misangpot kini sa mainitong panaglalis ug nagbugno hangtud nga milanit og kutsilyo ang suspek ug gidunggab ang biktima sa walang bahin sa lawas niini ug gidala sa tambalanan.

Ang suspek nga nadakpan gikatakdang pasakaan og kasong frustrated homicide. (BANATNEWS)