Duha naghikog, usa napakyas

CEBU, Philippines - Duha ka mga tawo ang naghikog usa kanila ang nadayonan samtang ang usa natabang human mabugto ang telephone cord nga iyaha untang gigamit pagbitik sa iyang liog, ang duha ka insidente nahitabo niadtong Miyerkules.

Naghikog ug namatay ang usa ka lolo human kini maghigot sa iyang liog og electrical cord sulod sa ilang panimalay niadtong Miyerkules sa alas-4 pasado sa hapon sa barangay Consuelo sa lungsod sa San Francisco isla sa Camotes.

Ang naghikog giila sa kapulisan nga mao si Marvyn Nudalo Olofernes, 54, nga residente ra sa lugar nga nahitaboan.

Segun sa report sa kapulisan nga usa ka Gabriela Nudala Manrique, 51, asawa sa naghikog maoy mipahibawo sa kapulisan human nadiskobrihan niini ang iyang bana nga patay na ug may wire sa liog.

Sa gihimong imbestigasyon sa kapulisan nagbutyag nga mitug-an ang asawa nga sa wala pa maghikog iyang bana, duna kini ‘major depression syndrome’ nga gitawag kini og nervous breakdown.

Niadtong higayona nag-inusara lang si Marvyn sa ilang balay kay ang asawa niini mitambong sa monthly meeting may labot sa iyang trabaho isip usa ka daycare worker.

Nianang pagkahapon pag-uli sa ginang maoy misugat kaniya ang iyang bana nga patay nang nagbitay apan gisuwayan pa unta nila pagdala ngadto sa Ricardo Maningo District Hospital apan patay na kini.

Samtang napakyas ang usa ka 38-anyos nga lalaki kinsa misuway paghikog apan nabugto ang telephone wire nga maoy iyang gihigot sa iyang liog hinungdan sa pagkamumo sa simod niini ug naangol.

Nahitabo kini sa giabangan nga lawak diha sa barangay Ermita siyudad sa Sugbu sa miaging alas-11 pasado sa gabii. Si Raul Cerna, 38, anaa karun sa Cebu City Medical Center (CCMC) tungod sa pagkaangol.

Segun sa taho sa kapulisan nga nagselos si Cerna sa iyang kapuyo dihang naabtan nga dunay gika-chat nga usa ka langyaw sulod sa internetan diha sa maong lugar.

Si Cerna giingong mipauli kini sa ilang giabangan nga lawak ug nakahukom nga maghikog gamit ang telephone wire ug gihigot sa iyang liog apan dihang nainat na ang telephone wire nabugto kini.(EIM) (BANATNEWS)