CEBU, Philippines - Gipasalamatan ni Mayor Jonas Cortes ang mga establisamento sa dakbayan sa Mandaue nga matinud-anong mibayad sa ilang tinuig nga buhis.
Atol sa Tax Payers Night sa miaging gabii 10 ka mga nag-unang establisamento ang gihatagan og pasidungog ni Cortes.
Matud pa sa mayor nga nahimo nang kinaiya sa iyang administrasyon ang paghatag og pasidungog niadtong mga negosyante kinsa nagtan-aw usab sa kamahinungdanon sa pagtuman nila sa ilang obligasyon ngadto sa gobyerno.
Gani gumikan sa relihiyoso nilang pagbayad sa ilang buhisanan matag tuig, gipakita usab sa kagamhanan sa dakbayan ang mga maayong mehoras sa siyudad nga alang sa kaayohan sa tanan.
Ang mga establisamento nga nahatagan sa pasidungog mao ang Visayan Electric Company, (VEC0) Super Metro Gaisano, Vicsal Development Corp., Zuelleg Pharma Corporation, Coca Cola Bottlers Philippines Inc., JS Unitrade Merchandise Inc. Monde Nissin Biscuite Corp, United Laboratories Inc., Monark Equipment Corp. of the Philippines ug Philip Morris Fortune Tobacco Cigarette.
Gawas sa sertipiko nga ilang nadawat, gihatagan usab sila sa kagamhanan og 10 percent nga tax incentive isip pahalipay kanila sa kabuotan nila mobayad sa ilang buhis.
Lakip nga nakadawat og pasidungog mao kadtong mga balay patigayon nga milanat na og 42 anyos nga kadungan usab sa pagkahimugsong syudad sa Mandaue niadtong Agosto 30, 1969.
Ang maong mga balay patigayon nga may 42 na ka tuig karon mao ang Highland Cionfectionary MFG Inc., Querruben Construction Supply, Cebu Universal Lumber, Simon Enterprises, San Miguel Corporation, Benson Dacay Industries Inc., J. Cenapro Inc, Dr. Ignacio Cortes General Hospital, Lucy Pharmacy, Treasure Island Industries ug Gals Bakery. (BANATNEWS)