Testigos ni Garcia gipresentar

CEBU, Philippines - Gipresentar na sa mga abogado ni Governor Gwendolyn Garcia ang unang tulo ka mga testigo niini nga gilangkuban sa tulo ka mga department head sa Kapitolyo sa nagpadayong bista sa kasong usurpation and abuse of authority nga gisang-at ni kanhi Bise Gobernador Gregorio Sanchez Jr. batok sa gobernador.

Atol sa pagpaminaw sa maong kaso nga gipahigayon sa Department of Interior and Local Government sa miaging adlaw , ang gipresentar   nga testigos mao sila    si Provincial Administrator Eduardo Habin, Noli Vincent Valencia ang hepe sa Human Resource Management Department, ug Provincial Legal Officer Atty. Marino Martinquilla.

Ang maong mga testigos mipamatuod nga nahisubay sa balaod ang gibuhat sa gobernador   sa pagpanudlo niini og mga empleyado sa Vice Governor’s Office ug sa wala niini paglig-on sa overtime work sa mga empleyado sa bise gobernador.

Gipasabot ni Valencia nga nalatid sa balaod nga katungod sa chief executive, nga mao ang gobernador, sa pagpang-appoint sa mga empleyado sa buhatan sa bise gobernador.

Si Valencia nihimong sanglitanan sa desisyon sa Civil Service Commission kaniadto diin wala niini tugoti si kanhi bise gobernador Apolonio Abines kinsa mihangyo nga inay ang gobernador, siya nalang ang hatagan sa gahom sa pagpang-appoint sa mga empleyado sa iyang buhatan.

Sa isyu kalabot sa dili paglig-on sa gobernador sa overtime claim sa mga empleyado sa kanhi bise gobernador, gipasabot ni Provincial Administrator Eduardo Habin nga aduna nay polisiya panahon pa ni gobernor Pablo Garcia nga bugtong ang gobernador lamang ang makahatag og pagtugot sa mga empleyado sa lalawigan nga mag-overtime sa ilang mga trabaho aron dili maabusahan ang overtime services.

Sa sunod nga hearing, gitakda na ang pag-cross examine sa tulo ka mga witnesses nga gipresentar sa depensa ug ang pagpresentar sa dugang mga testigo ug usa na niini si 2nd district Board Member Peter John Calderon. (BANATNEWS)