No smoking sa siyudad higpitan
CEBU, Philippines - Hingusgan ni Mayor Michael Rama ang kampanya sa pagsumpo sa mga tawong magpataka og bulhot og sigarilyo ilabi na sa mga pampublikong lugar.
Nagkanayon si Rama nga gusto siyang mapatuman gyud ang anti-smoking ordinance aron mapanalipdan ang panglawas sa tawo ilabi na mas dakong kadaot ang mahatag niini ngadto sa makahanggab sa aso.
Nanghinaut ang mayor nga mokooperar ang publiko aron malikay sa mga sakit nga mahatag sa pagpanigarilyo sama sa sakit sa baga ug uban pa.
Sa kasamtangang ordinansa, ang panigarilyo gidili sa mga bus stations, mga opisina sa gobiyerno, eskwelahan, tambalanan, clinics ug gasolinahan.
Gani ang mga commercial nga mga establisamento adunay mga smoking areas apan gikinahanglang 10 ka metros ang distansya niini sa pultahan.
Mag-atubang og unom ka buwan nga pagkapriso o P3,000 nga multa ang mga tawong makalapas niini. (BANATNEWS)
- Latest
- Trending
