P20 gamay ra kaayo-ALU

Gamay ra kaayo nga epekto ang mahatag ngadto sa mga mamumuo sa P20 nga usbaw alang sa suhulan nga maoy resulta sa kapin sa lima ka oras nga deliberasyon sa Regional Tripartite Wages and Productivity Board (RTWPB 7) sa miaging adlaw.

Kini maoy gibutyag sa tigpamaba sa Associated Labor Union-Trade Union Congress of the Philippines nga si Joy Lim kinsa nasagmuyo sa maong desisyon gumikan kay taas nga panahon ang ilang pakigbisog aron lang gyud mapatas-an og P100 ang suweldo sa mamumuo apan P20 ra diay ang sangpotanan niini.

“Hinuon, maayo na lang na kaysa wala. Apan dili gyud na ma-feel sa mga trabahante. Wa ko kasabot kung nganong kana ang ilang nahuna-hunaan nga usbaw,” saysay pa ni Lim dinhi sa Banat News.

Gikan sa P285 nga kasamtangang minimum wage, mahimo na kini karong P305 ug kini mo-epekto human 15 ka adlaw nga publikasyon sa maong kamandoan.

Ang RTWPB misaysay nga gipaubos gyud sa taas nga proseso sa wala pa nila mahukmi ang kantidad sanglit ilaha kini nga gibalanse sa kasamtangang estado karon sa ekonomiya.

Apan ang mga representante sa board nga naggikan sa labor sector wala makontento tungod sa kamahal sa mga nag-unang panaliton. Ang representante sa negosyante nga si Charles Streegan nagkanayon daghan unyang mga negosyante ang masagmuyo niini sanglit dako ra gyud kaayo ang maong kantidad.

Ang business sector nabalaka gumikan kay posibleng daghan na unya nga mga negosyo ang manira gumikan sa usbaw sa suholan.

Samtang si Remirina Morquello, usa ka mamumuo ang misaysay dinhi sa Banat News nga bisan gamay ra ang P20 nalipay lang gihapon siya niini ug midugang nga pag-budget nalang gyud ang iyang mahimo. (BANATNEWS)