Comendador gipatubag bahin sa Aloguinsan

CEBU, Philippines - Giklaro ni Sr. Supt. Patrocinio Comendador kang Gob. Gwendolyn Garcia nga dili 300 ka polis kundili mga sakop sa 78th Infantry Battalion ang kadaghanan sa mga mibantay sa pagpatuman sa temporary restraining order sa korte alang sa pagpadayon sa pagkoral sa kontrobersyal nga luna sa barangay Bonbon sa lungsod sa Aloguinsan.

Kini human nakadawat og reklamo si Garcia nga 300 ka mga polis ang atoa didto nga katingalahan alang sa gobernador sanglit niadtong adlawa holiday man.

Si Comendador kinsa gipatawag ni Garcia kagahapon miingon nga wala makaabot og 100 ka polis ang gipadala didto ug nadugangan lang sila sa gi-augment nga mga sundalo.

Ang tensyonadong hitabo misangpot sa kagubot tali sa mga polis ug mga mag-uuma nga miresulta sa pagkadakop sa 36 ka mag-uuma ug tulo ka estudyante.

Ang mga polis mipasaka na og kasong direct assault ingon man resisting arrest batuk sa mga gidakop kagahapon taliwala sa pabiling pag-insister sa mga mag-uuma sa ilang baruganan nga ilaha ang maong yuta.

Samtang ang supervising investigator sa Commission on Human Rights (CHR)-7, Primo Cadampog, dihang nahinabi sa Banat News miingon nga ikaduha na kining hitabu sa maong lugar sugod niadtong petsa 7 sa milabay’ng bulan sa Hulyo.

Ang 36 ka mga mag-uuma niadtong Lunes gipanakop sa kapolisan tungod sa alegasyong nanakit sila sa mga polis nga gitahasang mobantay aron mapatuman ang TRO pabor sa mga Gantuangco.  (BANATNEWS)