CEBU, Philippines - Hingpit na gipasaka kagahapon sa kapolisan ngadto sa korte ang kaso batok sa 36 ka mga mag-uuma sa lungsod sa Aloguinsan nga nakig-riot sa mga otoridad sa miaging adlaw.
Kini luyo sa daghang reklamo nga gipabati sa hugpong sa mga mag-uuma didto sa buhatan sa Provincial Prosecutor’s office, didto isang-at ang kasong Direct Assault to an Agent of Person in authority ug Resistance and Disobedience to an Agent or a Person in Authority. Matud pa ni Assistant Provincial Prosecutor Petronio Elesterio nga aduna siyay nakitang basehan nga mapasaka gayud ang kaso nga gisang-at sa kapolisan.
Samtang sa bahin ni manlalaban Poch Cinco, ang abogado sa mga akusado nagkanayon dili sila mopirma og bisan unsang waiver tungod kay ang pagdakop sa iyang mga kliyente illegal.
Gani matud pa ni Cinco nga nagplano usab sila nga mosang-at og counter charges batok sa kapolisan nga maglakip sa mga kasong administrative ug criminal sama sa grave misconduct, arbitrary detention, robbery, ug violation of constitutional rights.
Midugang siya nga ila pang gihan-ay ang posibling mga kaso nga ilang ipasaka sa kapolisan ug ilakip nila pagkiha si Police Regional Director Ager Ontog gumikan matud pa nila sa kapakyas sa maong opisyal sa paghimo og lakang kalabot sa maong hitabo.
Samtang si Supt. Mark Gifter Sucalit, Deputy chief sa Provincial Intelligence Branch mibutyag nga ang pagposas nila sa tanang mag-uuma bisan paman og anaa na sulod sa Palace Of Justice usa lang ka safety measure nga angayan nilang ipatuman tungod sa kadaghan nila. Matud pa ni Sucalit nga ang kapolisan igo lang mituman sa ilang katungdanan ug wala silay nalapas nga balaod.
Si PO3 Jehaezeil Hoyu-a, usa sa mga escort police sa iyang bahin mihimakak usab sa pasangil sa pipila ka mag-uuma nga nangulata sila sa wala pa nila kini dad-a sa Palace of Justice. Gibutyag usab ni Hoyu-a nga wala usab sila makadungog og reklamo sa maong mga mag-uuma sulod sa sakyanan samtang nagbiyahe pa sila paingon sa dakbayan sa Sugbo gikan sa Aloguinsan apan sa diha na sila sa Palace of Juctice didto na kini magsugod sa hiwasa. (BANAT)