Dalagita gilugos sa 2 ka barakda

CEBU, Philippines - Usa ka dalagitang 17 anyos mireklamo kay gilugos siya sa duha niya ka barkadang lalaki didto sa   katubhan sa sitio Martinez, barangay Caputatan Norte, lungsod sa Medillen niadtong Martes sa ala 1:00 sa kaadlawon.

Ang biktima nga   gitago lang sa ngalang Love (di tinuod nga ngalan) molupyo sa maong lugar, samtang ang mga suspetsado   iyang giila nga sila si Kenneth Verano ug Ed Monino, pulos hingkod ang edad nagtungha sa 4th year high school   nga iyang mga silingan.

Si PO2 Roland Robin sa Medillen Police Station mibutyag sa Banat News nga ang biktima kauban sa iyang higala nga si Jane Rose Idanan ug ang duha ka suspek   sa sayo pa nag-inom ug nanayaw sa diskohan sa maong lugar   sa wala pa mahitabo ang pagpanglugos.

Matud pa ni PO2 Robin nga migawas ang biktima sa diskohan kay mangihi ug nagpakuyog siya kang Idanan apan pag-abot niya sa katubhan gibiyaan siya ni Idanan kay mibalik kini sa diskohan.

Midugang pagtug-an ang biktima nga samtang mipungko siya ug nangihi, nagsuka siya gumikan sa kahubog sa bino nga ilang giinom apan miabot ang duha ka suspek dayon nawad-an siya og panimuot.

Unya dihang nahuwasan na siya mao nalay iyang nasayran nga naghigda siya sa yuta sa katubhan nga hubo na ang tibuok lawas ug ang mga suspek diha sa iyang atubangan.

Dihang iyang namatikdan nga gilugos siya igo nalang siyang mihilak ug mipauli sa ilang balay aron pagsumbong sa iyang ginikanan sa iyang gidangatan.

Nadakpan usab dayon sa mga otoridad ang mga suspek kinsa mikagulkol na karon sa prisohan samtang gihikay na ang kaso nga isang-at batok kanila. (BANAT)