Koreano nakawata'g P120 mil nga butang

CEBU, Philippines - Gibanabanang mokabat sa P120 mil ug 380 mil Korean Won ang nakawat gikan sa gipuy-an sa usa ka Korean national didto sa Sitio Kadulang, barangay Marigondon, dakbayan sa Lapulapu human kini lungkaba sa wala hiilhing kawatan kagahapon.

Ang biktima nga midangop sa kapolisan mao si Park Sung Sok, hingkod, ug kasamtangang nagpuyo sa usa ka apartment sa maong dapit. Matud pa ni Park nga wala siya sa iyang gipuy-an dihang gilungkab ang iyang kuwarto pinaagi   pagguba sa pultahan sa likod nga bahin sa iyang giabangang apartment.

Ang nawagtang mao ang iyang Notebook computer ,wedding ring,I-phone, digital camera ug cash nga mobalor og P17,500 nga iyang gibutang sa drawer nga ang tanan gibana-banang mokantidad og mga P120 mil, way labot kini sa 380 mil nga Korean Won ug uban pang mga kabtangang nawagtang.  - BANAT NEWS