Bayong-bayong gipusil sa ig-agaw

CEBU, Philippines - Kritikal ang kahimtang sa 13 anyos nga bayong-bayong human kini pusila sa   iyang ig-agaw nga  giingong sakop sa Bloods gang didto sa sitio Sta. Maria sa barangay Pusok, dakbayan sa Lapulapu sa miaging kaadlawon.

Ang biktima mao si Winston Ycong, 13, nga nagpuyo sa maong dapit samtang ang suspetsado mao si England Ycong, 18, nga taga sitio Pusok Cemento sa barangay Pusok sa maong dakbayan nga giingong ig-agaw sa biktima ug sakop sa Bloods gang.

Si PO2 Allan Pantaleon sa homicide section sa kapolisan sa maong dakbayan miingon nga naglingkod-lingkod lang sa daplin sa dalan sa maong dapit ang biktima dihang mitumaw ang suspetsado kuyog sa wala pa hiilhing mga kaubang mga lalaki ug kalit lang namusil bisan walay igong hinungdan.

Dugang pa ni PO2 Pantaleon nga human sa maong pagpamusil ang suspetsado ug mga kauban dali kaayong nanagan pahilayo ug wala na maabti sa kapolisan   nga miresponde sa maong alarma.

Ang biktima nga nasabak   iyang bukobuko dali nga gihatod sa mga kabanay ngadto sa Mactan Doctors Hospital sa barangay Basak sa maong dakbayan apan   gibalhin kini ngadto sa Vicente Sotto Medical Center sa dakbayan sa Sugbo.

Si PO2 Pantaleon miingon nga sa pasiunang imbestigasyon nga ilang gihimo ilang nasuta nga ang biktima giingong sakop usab sa Crips gang nga kontra sa Bloods gang ug gituohan sa kapolisan nga mao kini ang hinungdan sa maong pagpamusil. Padayon pang gipangita sa kapolisan ang suspetsado ug ang mga kauban niini.  - BANAT NEWS