Belmonte misuporta sa Philippine Arena

CEBU, Philippines - Hingpit nga gisuportahan ni House Speaker Feliciano “Sonny” Belmonte Jr. ang pagtukod sa Philippine Arena (PA), ang 50,000 seating capacity   nga labing dako, labing moderno, ug pinakatahom nga “indoor arena” sa tibuok kalibotan nga gitakdang buksan   sa unang centenario sa Iglesia ni Cristo (INC) sa umaabot nga 2014. 

“Ito’y isang panaginip na nagaganap, na sang-ayon kay Ka-Eduardo Manalo  , iyon ay dati nang pangarap ng   yumaong Kapatid na Eraño   G. Manalo at ngayon ay maisakatuparan na,” sumala kang Belmonte sa interview nga gihimo sa mga tigbalita   nga gipasalida sa You Tube “Philippine Arena “, atol sa ground breaking ceremony didto sa lungsod sa Bocaue, lalawigan sa Bulacan sa miaging adlaw.

Ang seremonyas sa ground breaking gipangunahan sa pagdumala sa INC nga si Ka- Eduardo V. Manalo ug sa mga ministro sa INC.

Gipasalamatan ni Manalo ang tanang mga opisyal sa kagamhanang lokal ug nasudnong kagamhanan nga mitambong sa maong kalihokan lakip na ang mga langyaw nga mga kontraktor, designer ug arkitekto sa labing ambisyoso nga proyekto sa INC nga dili lamang para sa iyang mga miyembro kundi para sa tanang Pilipino ug sa tanang tawo sa tibuok kalibotan.

Matud pa niya nga ang PA ipatukod sa INC dili lamang alang sa mga dagkong   kalihokan   sa mga myiembro niini ,   kundi sa mga dagkong aktibidad sa mga Pilipino ug sa international nga mga tigum ilabi na sa sports nga dugang makapadani sa mga turistang langyaw , nga ang tanan “alang sa kahimayaan sa Dios, sa nasud , ug sa katawhang Pilipinhon”, matud niya.

Si Belmonte sa iyang bahin dako kaayo og pagsalig nga karong panahona wala nay makabintaha ning talagsaon ug usa sa iyang matang nga edipisyo sa kadako, ka moderno, katahom ug kalig-on niining PA kun itandi sa mga labing giila sa kalibotan nga indoor arena.

Kini tungod kay ang   mga kontraktor, designer ug arkitekto niining maong   esdipisyo pulos mga inila sa tibuok kalibotan sama sa Populous Company, nga gipangunahan sa iyang architectural designer consultant nga si Andrew James nga maoy nag-design sa O2 World Arena sa Berlin, Germany; Wimbley Stadium   sa London , United Kingdom; Yankee Stadium sa New York, USA; ug uban pa.

Buro Happold Company nga gipangunahan usab sa iyang structural design consultant nga si Chris Sparrow nga maoy nagdesinyo sa Arsenal Emirates Arena sa London, United Kingdom; Transbay Transit Center sa San Francisco, USA; Aviva Stadium sa Dublin , Ireland; ug uban pa.

Hanwha Engineering and Construction nga maoy kontraktor sa halos tanang  sports complex sa tibuok South Korea sa pagpanguna ni   engineering consultant Hyung Chung Kim.

Ang tanang material sa PA adto maggikan sa South Korea ug uban pang nasud sa gawas ug anhi nalang asembola sa Pilipinas .

Sa kasamtangan ang  labing dagkong indoor arena sa tibuok kalibotan mao ang 21,000 seating capacity nga Staples Center sa Los Angeles, USA; 20,000 seating capacity nga Madison Square Garden sa New York; ug ang 20,000 seating capacity nga O2 Arena sa London.

Sila si James, Sparrow ug Hyung   mitug-an atol sa interview   nga nakurat sila dihang gidapit sila sa INC nga maoy padesinyohon sa labing dako nga indoor arena   sa tibuok kalibotan kay wala sila magdahum nga sa kagamay sa Pilipinas ug sa ka-minoridad nga grupo sa INC   makapangambisyon og ingon niini ka dakong proyekto.

Ang PA may tennis court, basketball court ug para sa mga gymnastic nga duwa pang lokal ug international .

Ang maong edipisyo nga may anti-earthquake design, may gilapdon sa atop nga 160 metros, may mga steel work nga 9,000 ka tonil, flooring nga pulos tiles ug fully air conditioned.

Ang 70 ektaryas nga tarokan sa PA nga tawgong “Ciudad de Victoria” palibotan usab sa EGM Medical Center nga may 330 bed capacity, Bocaue Campus sa New Era University, New Era Sports Complex , housing   units ug Kapilya sa INC.

Ang general auditor sa INC Glecerio Santos Jr. nagkanayon nga ning maong proyekto gipakita lamang nga ang matag sentabo nga gihalad-amot sa matag usa ka INC sa panahon sa ilang mga pagsimba, gimahal ug girespetohan sa   pagdumala sa INC ug labaw sa tanan gipanalanginan sa Dios. (BANAT NEWS)