Hostage taking: Hepe pahulipan

CEBU, Philippines - Buot nga pahulipan ni Dumanjug Mayor Nelson Garcia si Senior Inspector Rully Lauron inig kahuman sa imbestigasyon sa Provincial Investigation and Detective Management Branch sa nahitabong hostage-taking sa mismong presinto niadtong Domingo.

Si Garcia miresponde sa maong hostage ug mibutyag nga daghan kaayo siyang nakit-ang lapso sa pamaagi ni Lauron pagkontrolar sa sitwasyon.

Napusilan sa maong hitabo ang suspek nga si Zafra Camacho, 26, kinsa giingong kalit nga mi-takeover sa police station pinaagi sa pag-hostage sa bisitang babaye ni Lauron nga si Helen Recuerdo ug gigamit pa ang mismong armas nga kalibre .45 ni Lauron.

Milanat og tulo ka oras una pa nasanta ang suspek nga napusilan ni Lauron tungod kay nahutdan na og bala tungod sa pagpunay niini og pasalba ug naluwas si Recuerdo, samtang naangol ang suspek.

Si Garcia dihang gikahinabi sa The FREEMAN nga igsuon pamantalaan sa Banat News miingon nga iyang nabantayan nga naapektahan ang paghimo og desisyon ni Lauron tungod kay kapuyo diay niini si Recuerdo.

“Mura siya’g galutaw kay attached siya sa situation kay iyang girlfriend involved,” matud pang Garcia kinsa misugyot nga unta gihatag nalang ni Lauron ang pagsulbad sa krisis.

Dugang pa ni Garcia nga kuwang usab sa pagpangandam sa seguridad ang hepe sa iyang presinto. Dugang pasangil ni Garcia nga wala gani mangayo og tabang si Lauron sa iyang mga sakop.

“Dili sila paapilon og tabang mao nay dakong lapses sa trabaho, agi-agian lang ko sa atubangan and it was the other police ang miingon nga gub-on ang doorknob and not him,” dugang pa ni Garcia.

Nahibulong usab si Garcia nganong gitugotan ang maong bisita nga alas-9 na sa gabii ug aduna pay nadunggan niyang report nga giingong diha pa kini matulog.

Hinuon si Lauron dihang gikuhaan sa iyang habig miangkong iyahang uyab si Recuerdo apan kini miklarong padulong na silang mouli dihang nahitabo ang hostage drama.

Gipasalig niyang andam siya moatubang sa imbestigasyon nga gihimo karon ni Atty. Julius Ompad, ang officer-in-charge of the Provincial Investigation and Detective Management Branch.

Si Ompad miingon nga ilahang susihon kung may ‘operational lapses’ si Lauron sa hitabo. (BANAT NEWS)