Sikyu giliog pagdunggab patay

CEBU, Philippines - Patay ang usa ka security guard human kini lioga sa pagdunggab sa wala mailhing lalaki kagahapon sa hapon diha sa Governor Cuenco Avenue, barangay Banilad, dakbayan sa Sugbo.

Ang biktima mao si Eduardo Rabasa, 27, taga dalan B. Rodriguez Extension, sitio Kawayan, dakbayan sa Sugbo ang nakaangkon og usa ka samad dinunggaban sa liog hinungdan sa iyang kamatayon.

Si Roberto Causa, 23, kinsa diha sa lugar atol sa hitabo mibutyag sa kapolisan nga usa ka lalaki ang milabay diha sa iyang atubangan ug mipaingon kini ngadto sa nahimutangan ni Rabasa.

Pila ka minutos ang milabay si Causa nakadungog og singgit diin sa iyang paglingi nakita niya ang biktima nga misulting “gidunggab ko!”

Si Causa mitabang sa biktima samtang daling misibat sa sudlonon nga bahin sa lugar ang kriminal. Pag-abot sa mga polis si Rabasa nagbuy-od na kini ug wala na maglihok.

Usa ka kitchen knife nga nagkadugo ug gituohang maoy gigamit sa kriminal ang na-recover sa mga polis.

Si SPO1 Victor Ruel Ayuman sa Cebu City Police Office (CCPO) Homicide Section mibutyag nga sa ilang nahipos nga report, ang biktima giingong nakigrelasyon sa usa ka babaye sa establisamentong iyahang (Rabasa) gialagaran ug gituohan nilang love triangle ang motibo sa krimen. (BANAT NEWS)