Mag-uuma sa aloguinsan mokiha

CEBU, Philippines - Nagtinguha ang pundok sa mga mag-uuma nga mosumbalik pagpasaka og kaso batok sa kapolisan tungod sa gihulagway nilang pagpangharas ug pagdakop sa gibanabanang 39 ka sakop nila sa pamilya atol sa kagubot dihang ilang gibabagan ang tinguha sa pamilyang Guntuangco pagkoral sa luna nga ilang gitikad sa barangay Bobon lungsod sa Aloguinsan niadtong miaging buntag.

Ang tigpamaba sa San Roque Farmers Association, Roberto Engercial mibutyag sa Banat News nga ang kapolisan maoy nagsugod sa kagubot dihang ilang gipangduot, gitukmod ug gitamparos ang mga babaye ug ilang mga bata nga nibabag sa backhoe nga mokabkab unta sa ilang gitikad nga luna. Gibana-banang moabot og 168 hektarya ang giangkon sa pamilyang Guntuangco nga hugtanong gisupak sa mga mag-uuma sa maong lugar.

Gi-insister ni Engarcial nga kini gitikad na sa ilang mga katiguwangan gikan pa niadtong 1910 ug kini gideklarar nga timberland ug iya sa gobiyerno.

Matud pa nila kalit lang miabot ang maong pamilya niadtong 2010 ug midiretso og pangangkong ilaha ang maong luna. Ang hepe sa Aloguinsan Police Station nga si Insp. Jaime Tolentino mipasabot nga igo ra silang misunod sa kamanduan sa ilang labaw sa pagpatuman sa Temporary Restraining Order (TRO) sa korte nga nagtugot nga makapadayun og koral ang pamilyang Guntuangco sa maong luna.

Lakip sa plano nilang pasakaan mao ang pamilyang Guntuangco.

Si Tolentino mibutyag nga gitun-an nila karon ang pagpasaka og kasong obstruction of justice, direct assault ingon man serious physical injuries batok sa mga dinakpan tungod kay dunay mga polis nga gisabyagan og init tubig, ihi ug adunay gi-Indian pana.

Matud ni Tolentino nakapadayun na ang pagpakoral sa luna kagahapon (BANAT NEWS)