Naghikog kay wa padulga

CEBU, Philippines - Usa ka 26-anyos nga professional photographer ang giingong naghikog tungod kay giingong wala padulga sa iyang kapuyo ug napalgan patay na kagahapon sa buntag diha sa giabangang kwarto sa usa sa mga barangay sa dakbayan sa Sugbo.

Ang maong photographer (pangalan gipugngan sa Banat News) naabtan sa iyang kapuyo nga nagbitay na diha sulod sa ilang kwarto nga may higot sa iyang liog nga usa ka habol ug ang pikas tumoy gikutay ngadto sa babag nga kahoy sa kisame.

Si PO2 Leroy Baguio, sa Homicide Section sa Cebu City Police Office (CCPO) mibutyag nga nianang milabay’ng gabii miinom kini og beer ug dihang naabot ang kapuyo nagpapalit og burger.

Base sa spot report sa kapolisan giingong nasagmuyo kini ngadto sa kapuyo nga wala kini paliti og burger.

Apan ang imbestigador sa maong kaso nga si Baguio dihang gikahinabi sa The Freeman (igsuong pamantalaan sa Banat News) gawas sa burger, giingong mihangyo usab ang namatay nga makigdulog sa kapuyo apan gibalibaran kini hinungdan sa kasuko sa lalaki ug miresulta sa ilang panaglalis ug mibahad ang lalaki nga maghikog. Ang kapuyo sa lalaki milakaw ug diha matulog sa pikas kwarto. Ug nianang pagkabuntag iyaha kining gisusi sa ilang lawak ug nakugang kini sa naabtan nga nagbitay na kini ug wala nay kinabuhi.

Matud pa nga matag mahubog ang lalaki magpunay kini og hulgang maghikog ug maoy usab kini kun makainom.

Ang babaye daling nanawag og panabang ngadto sa ilang mga silingan aron makuha ang iyang bana-bana nga nagbitay.

Base sa talaan sa homicide section sa CCPO mikabat na sa pito ka tawo ang natalang naghikog sukad sa milabay’ng semana. (BANAT NEWS)