Malacañang himuong heritage site

CEBU, Philippines - Si Mayor Michael Rama gitakdang mangonsulta sa nagkalainlaing ahensya sa kagamhanan sa gilaraw niyang himoong heritage site ang Malacañang of the South.

Ang maong mga ahensya mao ang Cultural and Historical Affairs Commission (CHAC), Parks and Playgrounds Commission, City Tourism Office diin ang mayor makig-alayon usab kang Undersecretary Odette Ong sa Presidential Management Staff alang sa lapad nga diskusyon   ning maong   plano sa mayor.

Miingon si Rama nga sa higayong mahulma na nila ang tibuok development plan, iduso dayon nila kini ngadto sa Palasyo kinsa interesado usab sa ideya sa mayor nga himoong heritage site ang maong dapit ug kabutangan kini og museum aron makaagni og daghang turista nga moduaw sa maong   lugar.

Kahinumdoman nga taud-taud na nga isyu ang bahin sa laraw   sa Bureau of Custom (BOC) nga kuhaon pagbalik ang maong building apan misupak si Rama niini gumikan kay gusto niya nga ipreserba ang maong edepisyo aron magsilbi nga historical heritage ug landmark.

Gani miduso si Rama kaniadto og position paper ngadto sa hepe sa Presidential Management Staff nga si manlalaban Herminio Bagro .

Gitataw ni Rama nga angayan gyud nga imentinar ang historical value sa maong edipisyo sanglit nakadungag usab kini sa kanindot sa palibot sa Fort San Pedro ug Plaza Independencia. (WC)   - (BANAT NEWS)