Bigtime pusher nadakpan gipriso

CEBU, Philippines - Nagtingkagol sa karsel ang   usa ka bigtime pusher   kinsa nadakpan sa kapolisan didto sa iyang balay sa sitio Kawayan, barangay Yati lungsod sa Lilo-an sa miaging adlaw.

Ang nasikop nailhan nga si Ronald Wagas Sitoy, 28, molupyo sa maong lugar ug ilado kaayong bigtime drug pusher.

Sa pakighinabi sa Banat News ni SPO2 Marcelino Servilla, imbestigador sa Lilo-an police , iyang gibutyag nga sa sayo pa nakadawat sila og impormasyon kalabot ni Sitoy nga namaligya og shabu sa ilang balay.

Tungod niini, mipahigayon ang kapolisan og surveillance operation sulod sa duha ka semana sa palibot sa balay sa suspetsado dayon misuway sila sa pagpalit og shabu niini ug didto ilang natino   nga positibo sa maong negosyo ang suspek.

Busa wala na sila magduhaduha   sa pagkuha og search warrant sa buhatan ni RTC-Branch 28 Executive Judge Marilyn Laguna-Yap batok ni Sitoy.

Dihang ila kining gisilbi sa suspetsado, dali kaayo nila kining nasikop uban sa mga ebidensya sama sa hand bag nga adunay sulod nga usa ka dakong pakete sa gituohang shabu, nakuha usab ang paper bag nga gisudlan sa duha ka rolyo nga tin foil, duha ka armas sa kalibre .38, onse ka buhing bala sa kalibre .38, usa ka kabhang sa kalibre .38, duha ka cellphone ug cash nga nagkantidad og kapin P3 mil.    - (BANAT NEWS)