Hapon gikawata'g dul-an P2M

CEBU, Philippines - Dul-an 2 milyones ka pesos nga cash, alahas ang nadala sa tulisang milungkab sa panimalay sa usa ka Japanese national nga manager sa usa ka factory sa MEPZA pasado alas 5 sa kaadlawon sa dalan M.L Quezon barangay Cabancalan syudad sa Mandaue.

Ang biktima nailhan nga si Kentan Kobayoshi, manager sa Makoto Philippines nga nahimutang sa Mactan Processing Zone 1. Nasayran nga ang biktima midangop sa buhatan sa Mandaue City Police Theft and Robbery Section human niya nasayran nga siya gikawatan sa iyang balay.

Matud pa sa biktima nga mibangon siya gikan sa higdaanan aron unta mangasilyas ug nakugang nalang siya nga nagpasad na ang iyang mga butang sa kwarto ug ang masters bedroom abli na.

Tungod niini gisusi sa biktima ang iyang mga kabtangan ug diha niya madiskubrehing nawala na ang iyang Rolex nga relo, mahalong tsinelas ug cash nga 15 mil US Dollars, Japanese Yen nga nagkantidad og P500 mil sa kwartang Pilipinhon; 7, 200 US Dollars; P68,225, 450 Singaporean Dollars; 95,000 Japanese Yen, kini pulos gisulod og nagkalain-laing mga sobre. - (BANAT NEWS)