6 ka fishing boat nadakpan

CEBU, Philippines - Unom ka mga fishing boat didto sa isla sa Bantayan ang nasikop sa Provincial Anti illegal Fishing task Force (PAIFTF) sa miaging adlaw.

Kini ang gibutyag ni Joefrey Merencillo, ang team coordinator sa nahisgutang task force   human madawat ang report gikan sa kapolisan sa isla sa Bantayan.

Matud ni Merencillo nga unang nasikop ang upat ka fishing boat ug ang laing duha nadakpan nila sa miaging adlaw   gumikan sa paglapas niini sa   Section 89 ug section 90 sa Akta Republika 8550   nga mao ang   Philippine Fisheries Code of 1998.

Ang section 89 sa maong balaod nagbuot nga ilEgal ang paggamit sa fine mesh net o pukot nga pino og mata samtang ang section 90 nagdili sa paggamit sa Active Gear sa Municipal Waters ug uban pang Fishery Management Areas.

Gibutyag ni Merencillo nga kasagaran sa ilang nasikop mga panagatan nga gikan sa dakbayan sa Sagay, Negros Occidental apan didto managat sa kalawran sa Bantayan Island.

Ang mga dinakpan nag-atubang na sa kaso   nga gisang-at batok kanila   sa task force   didto sa    korte sa Bantayan.

Sa nasayran 21 na ka higayon nga nakasikop ang PAIFTF didto sa isla sa Bantayan human kini ilusad ni Governor   Gwendolyn Garcia   aron   mosanta sa mga illegal nga panagat.  - BANAT NEWS