Mga politiko gibadlong sa Akbayan

CEBU, Philippines - Bisan sa mando ni Presidente Benigno Aquino III nga dili na pasuwatan og ngalan ug papitlan og mga hulagway sa politiko ang mga proyekto sa gobyerno   sama sa inprastraktura ug mga sakyanan, daghan gihapong mga   opisyal dinhi sa Sugbo nga wala magpakabana sa maong sugo.

Kini makita kaayo sa mga   sakyanan sa kagamhanan ning dakbayan sa Sugbo kansang mga dagway ug pamarog sa mga opisyal nagbutaltal sa masigkakilid sa maong mga sakyanan.

Hinuon ang mga edukadong tawo nasayud nga gipakita lamang sa maong mga politiko ang kagahi nila og ulo ug way pagtahod sa mandar sa pamuno nasud.

Apan dili sila mosundog sa kinaiya sa maong mga politiko nga bisan kun makadaghan na ipalanog ni Presidente Benigno Aquino III ang   pagdili sa pagsuwat sa ngalan ug pagpapilit sa ilang mga dagway sa bisan haing proyekto inprastraktura ug mga sakyanan sa barangay. lungsod, syudad ug lalawigan gibali nila ang tingog sa pamuno nasud.

Busa ang mga batan-ong politiko sama kang Mikay Dumaboc, ang youth coordinator sa Sugbo sa grupong Akbayan miawhag sa mga hamtong nang mga politiko nga kinahanglang tumanon nila ang mando sa presidente sa nasud.

Ang maong panawagan nga mao ra og tamparos ngadto sa mga tiguwang nang mga politiko gipahimug-atan ni Dumaboc sa pag-ingon   nga dili angayan kining butahon sa mga nanggungis nang mga politiko tungod kay buhis sa katawhan ang gigasto sa mga proyektong inprastraktura   ug sa gipamalit sa mga sakyanan ug dili    kaugalingon sa maong mga politiko.

Nakita ni Dumaboc nga gumikan sa pagkahakog sa ubang mga politiko og popularidad hastang trak sa basura gisuwatan pa sa ilang ngalan nga nagpasabot nga angayan lang usab ibasura ang maong mga ngalan tungod kay wala kini respeto sa sugo sa presidente sa nasud.

“Kinahanglan nga motuman gyud unta sila. Huna-hunaon nila nga kanang mga proyekto gikan na buhis sa mga tawo ug dili na gikan sa ilang bulsa. Kung sensiro gyud sila motabang sa katawhan, dili na kinahanglan nga butangan pa gyud og ngalan ug dagway ang ilang mga projects,” nagkanayon si Dumaboc.

Nakadayeg hinuon si Dumaboc sa gibuhat sa kongresista sa amihanang distrito sa siyudad sa Sugbo nga si Rachel “Cutie” del Mar kinsa nagsugod na sa pagpatangtang sa iyang mga hulagway nga gipapilit sa mga bus nga iyang gipang-apod apod sa 46 ka mga barangay.

Apan nakita niya nga kadtong ubang mga politiko nalipay ra kaayong magsud-ong sa ilang mga dagway sa mga sakyanan sa gobyerno.

Sayo niini gimandoan ni Mayor Michael Rama si City Administrator Jose Marie Poblete nga mopahibawo sa mga barangay ug sa nagkadaiyang departamento sa hingpit nga pagpatuman ang kamandoan sa presidente sa nasud.  - BANAT NEWS